ಸಾಮಾನ್ಯವಾಗಿ “ಸನ್ಶೈನ್ ವಿಟಮಿನ್” ಎಂದು ಕರೆಯಲಾಗುವ ವಿಟಮಿನ್ ಡಿ, ನಮ್ಮ ದೇಹದ ಆರೋಗ್ಯವನ್ನು ಕಾಪಾಡಿಕೊಳ್ಳುವಲ್ಲಿ ನಿರ್ಣಾಯಕ ಪಾತ್ರವನ್ನು ವಹಿಸುತ್ತದೆ. ಇದು ನಮ್ಮ ಮೂಳೆಯ ಆರೋಗ್ಯ, ದೇಹದ ಪ್ರತಿರಕ್ಷಣಾ ವ್ಯವಸ್ಥೆಯ ಕಾರ್ಯ ಮತ್ತು ಮನಸ್ಥಿತಿಯ ನಿಯಂತ್ರಣಕ್ಕೂ ಅತ್ಯಗತ್ಯವಾಗಿದೆ.
ಇದರ ಪ್ರಾಮುಖ್ಯತೆಯ ಹೊರತಾಗಿಯೂ, ವಿಶ್ವದಾದ್ಯಂತ ಅನೇಕ ಜನರು vitamin D deficiencyಯಿಂದ ಬಳಲುತ್ತಿದ್ದಾರೆ. ಬಹುತೇಕರಲ್ಲಿ ಸಾಮಾನ್ಯವಾಗಿ ಕಂಡು ಬರುವ ವಿಟಮಿನ್ ಡಿ ಕೊರತೆಗೆ ಕಾರಣಗಳು, ರೋಗಲಕ್ಷಣಗಳು ಮತ್ತು ಪರಿಹರಿಸುವ ಮಾರ್ಗಗಳನ್ನು ತಿಳಿದುಕೊಳ್ಳೋಣ ಬನ್ನಿ.
ವಿಟಮಿನ್ ಡಿ ಕೊರತೆಗೆ ಕಾರಣಗಳು: ವಿಟಮಿನ್ ಡಿ ಕೊರತೆಯು ಸಾಮಾನ್ಯವಾಗಿ ನಮ್ಮ ಜೀವನಶೈಲಿ, ಆಹಾರ ಮತ್ತು ಪರಿಸರ ಅಂಶಗಳಿಗೆ ಸಂಬಂಧಿಸಿದೆ.
1. ಚರ್ಮವು ಸೂರ್ಯನ ಬೆಳಕಿಗೆ, ವಿಶೇಷವಾಗಿ ಯುವಿಬಿ ಕಿರಣಗಳಿಗೆ ಒಡ್ಡಿಕೊಂಡಾಗ ಮಾತ್ರ ದೇಹವು ವಿಟಮಿನ್ ಡಿ ಅನ್ನು ಉತ್ಪಾದಿಸುತ್ತದೆ. ಹೀಗಾಗಿ ಹೊರಾಂಗಣದಲ್ಲಿ ಕಡಿಮೆ ಸಮಯವನ್ನು ಕಳೆಯುವ ಹಾಗೂ ದೀರ್ಘ ಚಳಿಗಾಲವಿರುವ ಪ್ರದೇಶಗಳಲ್ಲಿ ವಾಸಿಸುವ ಜನರಲ್ಲಿ ವಿಟಮಿನ್ ಡಿ ಕೊರತೆ ಅಧಿಕವಾಗಿರುತ್ತದೆ.
2. ವಿಟಮಿನ್ ಡಿ ನೈಸರ್ಗಿಕವಾಗಿ ಕೊಬ್ಬಿರುವಂತಹ ಮೀನುಗಳು, ಮೊಟ್ಟೆಯ ಹಳದಿ ಭಾಗ ,ಹಾಲು ಮತ್ತು ಏಕದಳ ಧಾನ್ಯಗಳಂತಹ ಬಲವರ್ಧಿತ ಆಹಾರಗಳಲ್ಲಿ ಕಂಡುಬರುತ್ತದೆ. ಹೀಗಾಗಿ ಕಟ್ಟುನಿಟ್ಟಾದ ಸಸ್ಯಾಹಾರಿ ಆಹಾರವನ್ನು ಅನುಸರಿಸುವ ಅಥವಾ ಸಾಕಷ್ಟು ವಿಟಮಿನ್ ಡಿ-ಭರಿತ ಆಹಾರವನ್ನು ಸೇವಿಸದಿರುವುದು ವಿಟಮಿನ್ ಡಿ ಕೊರತೆಗೆ ಕಾರಣವಾಗಿದೆ.
3. ವಯಸ್ಸಾದಂತೆ ಮನುಷ್ಯನಲ್ಲಿನ ಸೂರ್ಯನ ಬೆಳಕಿನಿಂದ ವಿಟಮಿನ್ ಡಿ ಅನ್ನು ಸಂಶ್ಲೇಷಿಸುವ ಸಾಮರ್ಥ್ಯವು ಕಡಿಮೆಯಾಗುತ್ತದೆ ಹಾಗೂ ಗಾಢವಾದ ಚರ್ಮವನ್ನು ಹೊಂದಿರುವ ಜನರು ಹೆಚ್ಚು ಮೆಲನಿನ್ ಅನ್ನು ಹೊಂದಿರುವುದರಿಂದ, ಸೂರ್ಯನ ಬೆಳಕಿನಿಂದ ವಿಟಮಿನ್ ಡಿ ಅನ್ನು ಉತ್ಪಾದಿಸುವ ಚರ್ಮದ ಸಾಮರ್ಥ್ಯವನ್ನು ಕಡಿಮೆ ಮಾಡುತ್ತದೆ. ಇದು ಜನರಲ್ಲಿ ವಿಟಮಿನ್ ಡಿ ಕೊರತೆಗೆ ಒಂದು ಮುಖ್ಯ ಕಾರಣವಾಗಿದೆ.
4.ಉದರದ ಕಾಯಿಲೆ, Crohn’s ಕಾಯಿಲೆ ಮತ್ತು ದೀರ್ಘಕಾಲದ ಮೂತ್ರಪಿಂಡದ ಕಾಯಿಲೆಯಂತಹ ಕೆಲವು ವೈದ್ಯಕೀಯ ಪರಿಸ್ಥಿತಿಗಳು ವಿಟಮಿನ್ ಡಿ ಅನ್ನು ಪರಿಣಾಮಕಾರಿಯಾಗಿ ಹೀರಿಕೊಳ್ಳುವನಂತಹ ದೇಹದ ಸಾಮರ್ಥ್ಯವನ್ನು ದುರ್ಬಲಗೊಳಿಸುವುದರಿಂದ ಇಂತಹ ರೋಗ ಲಕ್ಷಣಗಳು ಇರುವವರಲ್ಲಿ ವಿಟಮಿನ್ ಡಿ ಕೊರತೆ ಸಾಮಾನ್ಯವಾಗಿ ಕಂಡು ಬರುತ್ತದೆ.
ವಿಟಮಿನ್ ಡಿ ಕೊರತೆಯ ರೋಗಲಕ್ಷಣಗಳು ಸೂಕ್ಷ್ಮವಾಗಿರುವುದರಿಂದ ಹೆಚ್ಚಾಗಿ ಗಮನಕ್ಕೆ ಬರದೇ ಇರುವುದು ನಮ್ಮಲ್ಲಿನ ಇತರ ಆರೋಗ್ಯ ಸಮಸ್ಯೆಗಳಿಗೆ ಸುಲಭವಾಗಿ ಕಾರಣವಾಗಬಹುದು. ವಿಟಮಿನ್ ಡಿ ಕೊರತೆ ಇರುವವರಲ್ಲಿ ಸಾಮಾನ್ಯವಾಗಿ ಕಂಡು ಬರುವ ಕೆಲವು ರೋಗ ಲಕ್ಷಣಗಳು ಇಲ್ಲಿವೆ ನೋಡಿ;
- ಮೂಳೆ ನೋವು ಮತ್ತು ಸ್ನಾಯು ದೌರ್ಬಲ್ಯಃ ಕ್ಯಾಲ್ಸಿಯಂ ಹೀರಿಕೊಳ್ಳಲು ವಿಟಮಿನ್ ಡಿ ಅತ್ಯಗತ್ಯವಾಗಿರುವುದರಿಂದ, ಅದರ ಕೊರತೆಯು ದುರ್ಬಲ ಮೂಳೆಗಳು ಮತ್ತು ಸ್ನಾಯುಗಳಿಗೆ ಕಾರಣವಾಗಬಹುದು.
- ಆಗಾಗ್ಗೆ ರೋಗಗಳು ಅಥವಾ ಸೋಂಕು: ನಮ್ಮ ದೇಹದ ರೋಗನಿರೋಧಕ ಶಕ್ತಿ ಉತ್ತಮವಾಗಿ ಕಾರ್ಯನಿರ್ವಹಿಸಲು ವಿಟಮಿನ್ ಡಿ ಅತ್ಯವಶ್ಯಕ ಅಂಶವಾಗಿದೆ. ಹೀಗಾಗಿ ಇದರ ಕೊರತೆಯಿರುವವರು ಆಗಾಗ್ಗೆ ಶೀತ, ಜ್ವರ ಅಥವಾ ಇತರ ಸೋಂಕುಗಳನ್ನು ಅನುಭವಿಸಬಹುದು.
- ಆಯಾಸ ಮತ್ತು ದಣಿವುಃ ಒಬ್ಬ ವ್ಯಕ್ತಿಯು ಸಾಕಷ್ಟು ನಿದ್ರೆ ಪಡೆದರೂ ಮೇಲೂ ಬರುವ ಆಯಾಸವು ವಿಟಮಿನ್ ಡಿ ಕೊರತೆಯ ಸಂಕೇತವಾಗಿರಬಹುದು.
- ಮನಸ್ಥಿತಿಯ ಬದಲಾವಣೆಗಳು ಮತ್ತು ಖಿನ್ನತೆಃ ಕೆಲವು ಅಧ್ಯಯನಗಳ ಸಮೀಕ್ಷೆ ಪ್ರಕಾರ, ವಿಟಮಿನ್ ಡಿ ಕೊರತೆಯಿರುವರಲ್ಲಿ ಖಿನ್ನತೆಯ ಸಾಧ್ಯತೆಯೂ ಅಧಿಕವಾಗಿರುತ್ತದೆ.
- ನಿಧಾನವಾದ ಗಾಯದ ಗುಣಪಡಿಸುವಿಕೆಃ ದೇಹದಲ್ಲಿನ ಗಾಯಗಳನ್ನು ಗುಣಪಡಿಸುವಲ್ಲಿ ವಿಟಮಿನ್ ಡಿ ಮುಖ್ಯ ಪಾತ್ರವನ್ನು ವಹಿಸುತ್ತದೆ. ಇದರ ಕೊರತೆಯು ಗಾಯಗಳು ನಿಧಾನವಾಗಿ ಗುಣವಾಗಲು ಕಾರಣವಾಗಬಹುದು.
ವಿಟಮಿನ್ ಡಿ ಕೊರತೆಯನ್ನು ಸರಿಪಡಿಸುವ ಕೆಲವು ಮಾರ್ಗಗಳು:
1. ಸೂರ್ಯನ ಕಿರಣಕ್ಕೆ ಮೈ ಒಡ್ಡುವುದು
2. ಆಹಾರದಲ್ಲಿ ವಿಟಮಿನ್ ಡಿ ಸಮೃದ್ಧವಾಗಿರುವ ಆಹಾರಗಳನ್ನು ಸೇರಿಸುವುದು.
3. ಸೂರ್ಯನ ಬೆಳಕು ಕಡಿಮೆ ಬೀಳುವ ಪ್ರದೇಶದಲ್ಲಿ ವಾಸಿಸುವವರು ವಿಟಮಿನ್ ಡಿ ಸಪ್ಲಿಮೆಂಟ್ ಸರಿಯಾದ ಪ್ರಮಾಣದಲ್ಲಿ ತೆಗೆದುಕೊಳ್ಳುವುದು.
4. ವಿಟಮಿನ್ ಡಿ ಕೊರತೆಯಿಂದ ರೋಗಲಕ್ಷಣಗಳು ಕಂಡು ಬಂದರೆ ನಿಮ್ಮ ರಕ್ತದಲ್ಲಿನ ವಿಟಮಿನ್ ಡಿ ಮಟ್ಟವನ್ನು ಪರೀಕ್ಷಿಸುವುದು.
ವಿಟಮಿನ್ ಡಿ ಕೊರತೆಯು ಒಂದು ತಡೆಗಟ್ಟಬಹುದಾದ ಸ್ಥಿತಿಯಾಗಿದ್ದು, ಅಪಾಯದ ಅಂಶಗಳು ಮತ್ತು ರೋಗಲಕ್ಷಣಗಳನ್ನು ಅರ್ಥಮಾಡಿಕೊಳ್ಳುವ ಮೂಲಕ, ನಾವು ವಿಟಮಿನ್ ಡಿ ಕೊರತೆಯನ್ನು ತಡೆಗಟ್ಟಬಹುದಾಗಿದೆ.